Бран оставки во австриската политика
Foto

Бран оставки во австриската политика

Вчерашниот ден го одбележаа неколку оставки на политичари на високи функции во Австрија.

Прво лидерот на Народна партија на Австрија (ОВП), поранешниот канцелар Себастијан Курц соопшти дека се повлекува од политиката. Курц успешно ја водеше ОВП и на минатите избори во 2019 година освои 37 проценти од гласовите. Курц на 9 октомври се повлече од функцијата канцелар откако беше обвинет за поткуп, корупција и нарушување на довербата.

До вчерашната најава на Курц се шпекулираше дека по завршувањето на истрагата против него тој може да се врати на политичкиот врв.

Неколку часа по Курц, и австрискиот канцелар Александар Шаленберг изјави дека се повлекува од функцијата, на помалку од два месеци по преземањето на должноста.

Оставката на конзервативниот политичар Шаленберг најави сериозни превирања во врвот на австриската политика, а особено во конзервативната Австриска народна партија (ОВП), коментира ДПА.

По Курц и Шаленберг, и министерот за финансии Гернот Блимел синоќа најави дека поднесува оставка.

Блимел се води како еден од обвинетите покрај Курц во истрагата за проневера и поткуп, поврзана со нарачување наводни лажни истражувања.

Австриските медиуми шпекулираат дека ОВП не сака да чека да види дали ќе се појават уште онлајн разговори кои дополнително би можеле да го оптоварат Блимел.

Во Австрија се шпекулира дека министерот за внатрешни работи Карл Нехамер би можел да ја преземе функцијата лидер на ОВП, но и како канцелар и министер за финансии.

 

Во австриската Влада може да дојде до дополнителни промени, бидејќи се споменува дека Нехамер би можел да ги замени министерката за економија Маргарета Шрамбек, министерката за земјоделство Елизабет Кестингер и министерката за интеграции Сузана Раб, членки на владата кои биле многу блиски со Курц.

0 Коментари

Остави коментари